Ukraynalılar kimləri prezident postunda görür?
Kiyev Beynəlxalq Sosiologiya İnstitutu Ukraynada martın 31-nə təyin olunmuş prezident seçkisi ilə bağlı sorğu keçirib. Novator.az-ın məlumatına görə, 31 yanvar-10 fevral arası 134 yaşayış məntəqəsində, 2007 nəfər arasında aparılmış sorğuya qatılanların 16,4 faizi prezident seçkisində şoumen Vladimir Zelenskiyə səs verəcəyini bəyan edib.
İndiki prezident Pyotr Poroşenko sorğu iştirakçılarının 10,8 faizinin, Ali Radanın deputatı, Batkivşina Partiyasının lideri Yuliya Timoşenko 9,6 faizinin dəstəyini qazanıb.
Deputat Yuri Boykonu respondentlərin 6 faizi, Radikal Partiyanın lideri, deputat Oleq Lyaşkonu 4 faizi, Vətəndaş Mövqeyi Partiyasının lideri, deputat Anatoli Qritsenkonu 3,7 faizi prezident postunda görmək istəyir.
Sorğuda iştirak edənlərin 17,8 faizi indiki prezidentin postu əlində saxlayacağını proqnozlaşdırır.
Pyotr Poroşenko 2014-cü il mayın 25-də Ukrayna prezidenti seçilib, iyunun 7-də səlahiyyətlərinin icrasına başlayıb.
Prezident postu uğrunda 44 namizəd mübarizə aparır.
