Vergi ombudsmanı institutu yaradılır
Vergilər Nazirliyində 2018-ci ilin yekunlarına və 2019-cu ilin vəzifələrinə həsr edilmiş geniş tərkibli kollegiya iclası keçirilib. Fevralın 14-də yayılan rəsmi məlumata görə, iclasda çıxış edən vergilər naziri Mikayıl Cabbarov 2018-ci ilin yeni vəzifələrin və iş prinsiplərinin icrası və tətbiqi baxımından çox əhəmiyyətli dövr olduğunu deyib, vergi sistemində struktur yenilikləri və kadr islahatlarının aparıldığını, inzibatçılıqda yeni prinsiplərin tətbiq edildiyini, qanunvericiliyin təkmilləşdirildiyini diqqətə çatdırıb.
Vergilər nazirinin müavini İlkin Vəliyev və nazirliyin departament rəhbərləri 2018-ci ildə görülmüş işlər, qarşıya qoyulmuş vəzifələrin icrasını təmin etmək istiqamətində həyata keçiriləcək tədbirlər barədə məlumat veriblər. Qeyd edilib ki, ötən il vergi daxilolmaları 7 milyard 415 milyon manata çatıb, nəzərdə tutulmuş proqnoz tapşırıqları tam icra edilib, qeyri-neft sektorundan daxilolmalar əvvəlki ilə nisbətən artıb, regionlar üzrə proqnoz tapşırıqlarına 114 faiz əməl edilib. Hesabata əsasən, dövlət büdcəsinə artıq ödəmələrin həcmi il ərzində 503,7 milyon manat və ya 21,4 faiz azaldılıb, vergi yoxlamalarının sayının əvvəlki ilə nisbətən 3,4 dəfə azaldılmasına baxmayaraq risklərin idarə edilməsi sistemi əsasında bir yoxlamaya düşən hesablamada 2 dəfəyədək artım qeydə alınıb.
Kollegiya iclasına yekun vuran Mikayıl Cabbarov deyib ki, sahibkarların hüquqlarını qoruyan yeni və daha effektiv mexanizmlərin yaradılması istiqamətində araşdırmalar aparılıb və inkişaf etmiş ölkələrin qabaqcıl təcrübəsi əsas götürülərək vergi ombudsmanı institutunun yaradılması qərara alınıb.
