37 deputat Paşinyanın proqramına yox dedi
Fevralın 14-də Ermənistan parlamenti hökumətin proqramına xeyir-dua verib. Novator.az-ın məlumatına görə, beşillik fəaliyyət proqramını 82 deputat dəstəkləyib, 37 deputat bunun əleyhinə çıxıb. Proqram fevralın 12-dən müzakirə olunurdu.
Ötən il dekabrın 9-da keçirilmiş növbədənkənar parlament seçkisində hökumət başçısı Nikol Paşinyanın “Mənim addımım” bloku qalib gəlib. Blok 132 deputatdan ibarət yeni parlamentdə 88 mandatla təmsil edilir. Çiçəklənən Ermənistan Partiyası 26 mandat, İşıqlı Ermənistan Partiyası 18 mandat götürüb.
Yanvarın 14-də Ermənistan prezidenti Armen Sərkisyan parlamentdəki “Mənim addımım” blokunun təqdimatını əsas götürərək Nikol Paşinyanı baş nazir təyin edib.
Nikol Paşinyan əsası 2013-cü ildə qoyulmuş Vətəndaş Sazişi Partiyasının lideridir. O, 2018-ci il mayın 8-dən hökumət başçısıdır.
