32 milyonun üstünə 3 milyon da gəldi
Fevralın 14-də sərəncam imzalayan dövlət başçısı İlham Əliyev “Azərbaycan Televiziya və Radio Verilişləri” Qapalı Səhmdar Cəmiyyətinə 2019-cu ilin büdcəsindən, prezidentin ehtiyat fondundan 3 milyon manat ayırıb. Bu, qurumun maddi-texniki bazasının möhkəmləndirilməsi və müasir avadanlıqla təchiz olunması zərurəti ilə əsaslandırılıb.
Novator.az bildirir ki, 2019-cu ilin dövlət büdcəsində “Azərbaycan Televiziya və Radio Verilişləri” Qapalı Səhmdar Cəmiyyəti üçün 32 milyon 82,9 min manat nəzərdə tutulub.
Azərbaycan Televiziyası 1956-cı ildə Mədəniyyət Nazirliyinin tabeliyində Bakı Televiziya Studiyası adı ilə fəaliyyətə başlayıb. 1957-ci ildə televiziya Radioinformasiya İdarəsi ilə birləşdirilərək Nazirlər Soveti yanında Dövlət Radio və Televiziya Verilişləri Komitəsi adlandırılıb. 1970-ci ildə qurum Dövlət Televiziya və Radio Verilişləri Komitəsi statusu alıb, 1991-ci ildə eyni adda şirkətə çevrilib. 2005-ci ildən “Azərbaycan Televiziya və Radio Verilişləri” Qapalı Səhmdar Cəmiyyəti kimi fəaliyyət göstərir.
Bu il yanvarın 15-də prezident İlham Əliyev Arif Alışanovu “Azərbaycan Televiziya və Radio Verilişləri” QSC-nin sədri vəzifəsindən azad edib. Hazırda sədrin səlahiyyətlərini Rövşən Rafiqoğlu həyata keçirir.
