Yoxlamaları dayandıran qanunda dəyişiklik
Milli Məclisin 12 fevral iclasında sahibkarlıq sahəsində aparılan yoxlamaların dayandırılması barədə qanuna dəyişiklik edilib.
2015-ci il noyabrın 1-dən qüvvədə olan qanun yoxlamaları 2021-ci il yanvarın 1-dək yasaqlayır (Baş Prokurorluğun korrupsiya cinayətlərinin araşdırılması üzrə apardığı yoxlamalar istisna olmaqla).
Novator.az bildirir ki, yeniliyə görə, nəzərdə tutulmuş müddətdə maliyyə bazarları sahəsində yoxlamalar aparmaq mümkün olacaq.
Hazırda qanun vergi yoxlamaları, gömrük auditi, dərman vasitələrinin keyfiyyəti, təhlükəsizliyi qaydalarına riayət edilməsi və qida məhsullarının təhlükəsizliyinə nəzarətin həyata keçirilməsi ilə bağlı yoxlamalar, “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanunun tələblərinə əməl edilməsinə nəzarət üzrə yoxlamalar, habelə insanların həyat və sağlamlığına, dövlətin təhlükəsizliyinə və iqtisadi maraqlarına mühüm təhlükə yaradan hallar üzrə yoxlamalar aparmaq imkanı verir.
