Bələdiyyələr üzrə illik məruzə
Ədliyyə nazirinin müavini Vilayət Zahirov Milli Məclisin 12 fevral iclasında bələdiyyələrin fəaliyyətinə inzibati nəzarət üzə illik məruzə ilə çıxış edib. AZƏRTAC-ın məlumatına görə, nazir müavini deyib ki, ötən il 72535 bələdiyyə aktı hüquqi ekspertizadan keçirilib: “Onların 69775-i qanunvericiliyə uyğun sayılıb, normativ hüquqi aktlara uyğun olmayan 2403 aktın dəyişdirilməsi və ya ləğvi üçün təkliflər verilib. Bu təkliflər əsasında 979 akt ləğv edilib, 1031 akt dəyişdirilib, qalan 384 təklifə baxılır. Qəbul edilməmiş 9 təklif üzrə məhkəmələrdə iddia qaldırılıb, 4 akt məhkəmədə ləğv edilib, 5 iddia baxışdadır.
İl ərzində 5921 hektar torpaq sahəsinin qanunsuz verilməsinin qarşısı alınıb, bələdiyyə aktlarının ekspertiza üçün vaxtında təqdim edilməməsinə görə bələdiyyələrin 143 vəzifəli şəxsi barəsində protokol tərtib edilərək məhkəmələrə göndərilib.
Bələdiyyələrin fəaliyyəti ilə bağlı 2247 müraciətdən 1988-nə qanunvericiliyin tələblərinə uyğun olaraq baxılıb, 141-i aidiyyəti üzrə göndərilib, 118 müraciət baxılmaqdadır. Müraciətlərin 82-si təmin edilib.
Bir sıra bələdiyyələrin işində nöqsanlara və qanun pozuntularına yol verilib. 26 araşdırmada cinayət əməlinin əlamətləri aşkar edildiyindən toplanmış materiallar hüquqi qiymət verilməsi üçün prokurorluq orqanlarına göndərilib. Həmin materiallardan 18-i üzrə cinayət işi başlanıb, digərlərinə baxılır”.
