Ovannisyan Sərkisyanın partiyasından gedir
Ermənistan Respublika Partiyasının İcra Orqanının üzvü Arpine Ovannisyan qurumdan ayrılmaq qərarı verib. Novator.az-ın məlumatına görə, o, “Facebook” səhifəsində yaydığı açıqlamada partiyadan ayrılmağını vəkilliklə məşğul olmaq istəyi ilə əsaslandırıb. Arpine Ovannisyan bu yaxınlarda vəkillik lisenziyası aldığını, həmçinin ictimai təşkilat yaratdığını bəyan edib.
1983-cü ildə anadan olan Arpine Ovannisyan Yerevan Dövlət Universitetinin hüquq fakültəsinin və onun aspiranturasının məzunudur. 2015-2017-ci illərdə ədliyyə naziri, 2017-2018-ci illərdə parlament sədrinin müavini olub.
2007-ci ildən Ermənistan Respublika Partiyasına Serj Sərkisyan sədrlik edir.
Serj Sərkisyan 1954-cü ildə Azərbaycanın Dağlıq Qarabağ bölgəsində doğulub. Azərbaycana qarşı işğalçı müharibənin qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən Ermənistanın müdafiə naziri olub.
1995-2008-ci illərdə Serj Sərkisyan Dövlət Təhlükəsizliyi İdarəsinin rəisi (sonradan milli təhlükəsizlik naziri), daxili işlər və milli təhlükəsizlik naziri (sonradan yenə milli təhlükəsizlik naziri), Prezident Aparatının rəhbəri, Milli Təhlükəsizlik Şurasının katibi (eyni zamanda müdafiə naziri), baş nazir kürsülərini tutub.
2008 və 2013-cü illərdə prezident seçilib.
Serj Sərkisyan ötən il aprelin 9-dək prezident postunu tutub, aprelin 17-si parlamentdə baş nazir seçilib və prezident sərəncamı ilə bu posta təsdiqlənib, ancaq aprelin 23-də xalq etirazlarına görə istefa verib.
Hazırda Respublika Partiyası parlamentdə təmsil olunmur.
