Pensiyalar nə qədər arta bilər?
Prezident İlham Əliyev əmək pensiyalarının sığorta hissəsinin indeksləşdirilməsinə sərəncam verib. Sərəncama əsasən, Əmək və Əhalinin Sosial Müdafiəsi Nazirliyi 2018-ci il üzrə orta aylıq nominal əməkhaqqının illik artım tempinə uyğun olaraq bütün növ əmək pensiyalarının sığorta hissəsinin artırılmasını təmin etməli; fərdi uçot sistemində fərdi hesabların sığorta hissəsində toplanmış pensiya kapitalı məbləğlərinin indeksləşdirilməsini həyata keçirməlidir. Artımın 2019-cu il yanvarın 1-dən hesablanması tapşırılıb.
Novator.az bildirir ki, Azərbaycan qanunvericiliyi əmək pensiyalarının ildə bir dəfə orta aylıq nominal əməkhaqqının artım tempinə uyğun indeksləşdirilməsini nəzərdə tutur. Proses Dövlət Statistika Komitəsindən Əmək və Əhalinin Sosial Müdafiəsi Nazirliyinə təqdim olunan rəsmi bilgi – orta aylıq nominal əməkhaqqının artım tempi göstəricisi əsas götürülməklə həyata keçirilir.
Ötən ilin yekun göstəricisi hələ açıqlanmayıb. Ancaq 2018-ci il dekabrın 1-nə Azərbaycan iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 2,9 faiz artıb. Bu göstəricini əsas götürən iqtisadçı Qubad İbadoğlu yazır ki, pensiyalar hər 100 manata 2 manat 90 qəpik, hər 50 manata 1 manat 45 qəpik arta bilər: “Bu ilə qədər 150 manat pensiya alan bundan sonra 154 manat 35 qəpik, 200 manat pensiya alan 205 manat 80 qəpik alacaq”.
