Məhbuslarla bağlı dinləmə keçirilib
Fevralın 7-si Müsavat Partiyasının qərargahında Siyasi Məhbusları Müdafiə Mərkəzi ilə Məhbus Ailələrinin Koordinasiya Mərkəzi ictimai dinləmə təşkil edib.
Dinləmələrdə hüquq müdafiəçiləri və onların siyasi məhbus kimi tanıdığı şəxslərin ailə üzvləri iştirak ediblər.
“Turan”ın məlumatına görə, Siyasi Məhbusları Müdafiə Mərkəzinin koordinatoru Oqtay Gülalıyev deyib ki, son günlər həbs yerlərində işgəncə halları geniş yayılıb: “Hakimiyyət onun dəst-xətti ilə razılaşmayanları həbs etməklə kifayətlənmir, həm də həbs yerlərində işgəncə verib qisas alır”.
Oqtay Gülalıyev bir sıra dindar məhbusların, həbsdə olan AXCP üzvlərinin işgəncələrə məruz qaldığını iddia edib.
Digər çıxışlarda da Azərbaycanda son zamanlar həbs yerlərində işgəncələrin, mənəvi-psixoloji təzyiqlərin artdığı vurğulanıb.
Ölkə rəsmiləri ölkədə siyasi məhbusların olmadığını bəyan edir. Eyni zamanda Ədliyyə Nazirliyinin Penitensiar Xidməti və Daxili İşlər Nazirliyi işgəncələrlə bağlı deyilənləri təkzib edir.
Avropa Şurası 2012-ci ildə siyasi məhbus anlayışının meyarlarını müəyyənləşdirib. Meyarlara görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
