55 partiyadan 3-ü hesabat verib
Siyasi partiyalar illik maliyyə hesabatlarını aprel ayının 1-dən gec olmayaraq Mərkəzi Seçki Komissiyasına (MSK) təqdim etməlidir. Bu, “Siyasi partiyalar haqqında” qanunun tələbidir. MSK hesabatları internet saytında yerləşdirib ictimaiyyəti məlumatlandırmağa borcludur.
Rəsmi dövlət qeydiyyatında 55 siyasi partiya var. 2018-ci il üzrə hələlik Yeni Azərbaycan Partiyası, Azərbaycan Xalq Demokratik Partiyası və Azərbaycan Naminə Alyans Partiyası hesabat verib.
Novator.az bildirir ki, Yeni Azərbaycan Partiyasının hesabatına görə, ötən il qurumun 9 milyon 413 min manat gəliri olub. Bunun 8 milyon 45,1 min manatı üzvlük haqqından gələn vəsaitdir, 1 milyon 367,8 min manatı isə dövlət büdcəsindən ayrılıb.
YAP 2018-ci ildə qurumun saxlanmasına və informasiya təminatına 5 milyon 17,9 min manat, ictimaiyyətlə əlaqələrə və seçki prosesinə 633,9 min manat, cari işlərə 1 milyon 281,5 min manat xərcləyib. Digər xərclər 496,4 min manat göstərilir.
Azərbaycan Xalq Demokratik Partiyasının və Azərbaycan Naminə Alyans Partiyasının hesabatlarında isə hər hansı gəlir-çıxar olmadığı bildirilir.
