Keçmiş əsir qayıtmaq istəmir?
Ermənistanda saxlanan Azərbaycan vətəndaşı Hüseynzadə Elnur Elman oğlu ilə bağlı yeni bilgilər yayılıb.
Elnur Hüseynzadə 2017-ci il fevralın 1-də Ermənistan-Azərbaycan qoşunlarının aralıq xəttində, cəbhənin Talış kəndi istiqamətində tutulub. 1995-ci ildə Bərdədə doğulmuş hərbi qulluqçuya işğal altında olan Dağlıq Qarabağda 2 il həbs cəzası kəsilib. Onun cəza müddəti 2019-ci il fevralın 1-də bitib.
Azərbaycanın Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası fevralın 5-də açıqlama yayaraq bildirib ki, saxlandığı Şuşa həbsxanasından çıxan Elnur Hüseynzadə fevralın 2-də Ermənistana aparılıb.
Həmin gün erməni kütləvi informasiya vasitələri Dağlıq Qarabağ rejiminin rəsmilərinə istinadla Elnur Hüseynzadənin Azərbaycan tərəfə təhvil verilmək istəmədiyini, başqa ölkəyə sığınmaq arzusunda olduğunu iddia edib, keçmiş əsirin Ermənistana aparılması bununla əsaslandırılıb.
Azərbaycanın Hərbi Prokurorluğu həmin gün bəyan edib ki, Müdafiə Nazirliyinin N saylı hissəsinin hərbi qulluqçusu olmuş Elnur Hüseynzadə 1 fevral 2017-ci ildə Goranboy rayonunun Tap-Qaraqoyunlu kəndi ərazisindən düşmən tərəfə keçib: “Həmin fakta görə 2 fevral 2017-ci ildə Elnur Hüseynzadəyə Cinayət Məcəlləsinin 274-cü maddəsi ilə (dövlətə xəyanət) cinayət işi başlanıb. 17 fevral 2017-ci ildə Elnur Hüseynzadənin həbsi barədə məhkəmə qərarı qəbul olunub”.
O da vurğulanıb ki, Elnur Hüseynzadə xidmət müddətində intizamsız davranışı ilə seçilib, mənfi xarakterizə olunub və dəfələrlə xidmət yerini özbaşına tərk edib.
