Hüquq müdafiəçisinə xəbərdarlıq edilib
Siyasi Məhbusları Müdafiə Mərkəzinin koordinatoru Oqtay Gülalıyev fevralın 5-də Daxili İşlər Nazirliyinə çağırılıb.
Oqtay Gülalıyevin “Turan”a dediyinə görə, nazirlikdə Baş İctimai Təhlükəsizlik İdarəsinin rəisi Oqtay Kərimovla görüşüb. Görüşdə əsasən onun işgəncələrlə bağlı yazıları müzakirə olunub: “Bundan başqa, vaxtilə Kür daşqınlarından, ölkənin şimal rayonlarında baş vermiş zəlzələdən ziyan çəkənlər barədə yazdıqlarımı, siyasi məhbuslarla bağlı arayışlarımızı, hesabatlarımızı xatırlatdılar”.
Oqtay Gülalıyev bildirib ki, onun bəzi yazılarını polisi gözdən salmaq, dövlətə qarşı çıxmaq kimi dəyərləndiriblər: “Mənə dedilər ki, yazırsan Azərbaycanda işgəncə laboratoriyaları var, haradadır o laboratoriyalar? Mən də son zamanlar məhkəmələrdə işgəncələrlə bağlı deyilənləri nəzərlərinə çatdırdım”.
Oqtay Gülalıyevin sözlərinə görə, orada xəbərdarlıq da alıb: “Mənə xəbərdarlıq etdilər ki, sənin yazılarını izləyirik, nəzarətdəsən, lazım olsa yenə əlaqə saxlayacağıq və çağıracağıq”.
Hüquq müdafiəçisinin idarə rəisi ilə söhbəti 2 saatdan çox çəkib.
“Turan” bildirir ki, Oqtay Gülalıyevin dediklərinə hələlik nazirlikdən, Oqtay Kərimovdan münasibət almaq mümkün olmayıb.
