Cəbhəçilərin həbsi davam edir
Ötən həftənin sonu tutulmuş AXCP fəalı Elnur Cabbarlının 10 sutka inzibati həbs cəzası aldığı bəlli olub.
Bu həftə isə digər AXCP fəalları Elnur Yusubov, Zahir Məmmədli və Amil Məmmədzadə inzibati qaydada həbs ediliblər. Amil Məmmədzadəyə 25, Elnur Yusubova 22, Zahir Məmmədliyə 13 sutka həbs cəzası verilib.
Məlumatı “Turan” agentliyi AXCP-yə istinadla yayıb.
AXCP-dən qeyd ediblər ki, 19 yanvar mitinqindən öncə və sonra tutulan partiya fəallarının sayı 33 nəfərə çatıb.
Yanvarın 19-da Demokratik Qüvvələrin Milli Şurası Yasamal rayonundakı İdman-Sağlamlıq Kompleksinin stadionunda mitinq keçirib.
Bakı Şəhər İcra Hakimiyyətinin sanksiyalaşdırdığı aksiyada bloqçu Mehman Hüseynovun və bəzi hüquq müdafiəçilərinin siyasi məhbus kimi tanıdığı başqa şəxslərin azadlığa buraxılması tələb edilib.
Milli Şura yanvarın 26-da da eyni yerdə mitinq keçirmək istəyib. Lakin Bakı Şəhər İcra Hakimiyyəti bildirib ki, 19 yanvar mitinqindən sonra ictimai asayiş pozulub, eyni zamanda Milli Şuranın üzvləri yanvarın 20-də Bakıda Şəhidlər xiyabanını ziyarət zamanı bir sıra qanun pozuntusuna yol veriblər. Bunları əsas gətirərək meriya 26 yanvar mitinqinin keçirilməsinə razılaşmayıb.
Demokratik Qüvvələrin Milli Şurası müxalifətin bir hissəsini birləşdirir. Şuraya tarixçi professor Cəmil Həsənli sədrlik edir. Şuranın liderlərindən biri Xalq Cəbhəsi Partiyasının sədri Əli Kərimlidir.
