Büdcədən çıxarılan quruma dəstək verildi
Prezident İlham Əliyev Bakı Beynəlxalq Multikulturalizm Mərkəzinə dəstək sərəncamı imzalayıb. Fevralın 4-də verilən sərəncam 2019-cu ilin dövlət büdcəsindən, prezidentin ehtiyat fondundan mərkəzə 800 min manat ayrılmasını nəzərdə tutur.
Novator.az bildirir ki, Bakı Beynəlxalq Multikulturalizm Mərkəzi prezidentin 15 may 2014-cü il fərmanı ilə yaradılıb. Mərkəz tolerantlığın və mədəni, dini, linqvistik müxtəlifliyin qorunmasını təmin edən, habelə Azərbaycanı dünyada multikulturalizm mərkəzi kimi tanıdan və mövcud multikultural modelləri tədqiq və təşviq edən qeyri-kommersiya qurumu olan hüquqi şəxsdir. Fərmana əsasən, qurumun vəsaiti dövlət büdcəsindən ayırmalar; könüllü ianələr; qrantlar; səhmlər, istiqrazlar, başqa qiymətli kağız və əmanətlərdən alınan dividendlər, gəlirlər; sərgilərdən, konsertlərdən və məqsədinə uyğun digər tədbirlərdən əldə etdiyi gəlirlər; təsis etdiyi təşkilatların fəaliyyətindən əldə olunan gəlirlər; “Qeyri-hökumət təşkilatları (ictimai birliklər və fondlar) haqqında” qanunda nəzərdə tutulmuş digər mənbələr hesabına formalaşdırılır.
Nazirlər Kabinetinin 24 oktyabr 2014-cü il qərarı ilə Bakı Beynəlxalq Multikulturalizm Mərkəzinin işçilərinin say həddi 20 ştat vahidi təsdiq edilib.
Bu il yanvarın 14-də verilən prezident fərmanına əsasən, Bakı Beynəlxalq Multikulturalizm Mərkəzinin fəaliyyətləri özünümaliyyələşdirmə prinsipi əsasında həyata keçirilməklə yenidən təşkil olunmalıdır.
Mərkəzin Himayəçilik Şurasının üzvləri sırasında akademiklər Kamal Abdulla, Akif Əlizadə, bəstəkar Firəngiz Əlizadə, rəssam Tahir Salahov və başqaları yer alır.
