Azərbaycanlı əsir Qarabağdan Ermənistana aparılıb
Azərbaycanın Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası fevralın 5-də açıqlama yayıb.
Qeyd olunur ki, 2017-ci il fevralın 1-də Ermənistan hərbçilərinin işğal edilmiş Dağlıq Qarabağ ərazisində saxladığı və separatçı rejimin qeyri-qanuni məhkəməsinin azadlıqdan məhrum etdiyi Azərbaycan Respublikası vətəndaşı, 1995-ci il təvəllüdlü Hüseynzadə Elnur Elman oğlu bu il fevralın 2-də Ermənistan Respublikasına aparılıb. Məlumat aidiyyəti beynəlxalq təşkilatlardan daxil olan bilgiyə əsaslanır. Bildirilir ki, saxlandığı vaxtdan bəri Elnur Hüseynzadənin azad edilməsi ilə bağlı aidiyyəti beynəlxalq təşkilatlar qarşısında məsələ qaldırılıb və hazırda bu istiqamətdə zəruri işlər davam edir.
Ermənilər Elnur Hüseynzadəni 2017-ci il fevralın 1-də Ermənistan-Azərbaycan qoşunlarının aralıq xəttində, cəbhənin Talış kəndi istiqamətində tutduqlarını bildirirlər. İddiaya görə, həmin gün Ağdərənin Talış kəndi istiqamətində döyüş olub, 1995-ci ildə Bərdədə doğulmuş hərbi qulluqçu Elnur Hüseynzadə əsir alınıb. Azərbaycanın Müdafiə Nazirliyi bu iddiaları təkzib edib. Qeyd edilib ki, Elnur Hüseynzadə hərbi qulluqçu deyil.
2018-ci il fevralın 9-da Dağlıq Qarabağdakı qanunsuz məhkəmə Elnur Hüseynzadəyə 2 il həbs cəzası kəsdiyini elan edib. Onun cəza müddətinin başlanğıcının 2017-ci il fevralın 1-dən hesablandığı bildirilib.
