Şəhid ailəsi üçün prezident təqaüdü 13 ildə 200 manat artıb
Dövlət başçısı İlham Əliyev şəhid ailəsinin sosial müdafiəsi ilə bağlı fərman imzalayıb. Yanvarın 30-da rəsmiləşən sənədə əsasən, şəhid ailəsi üçün prezident təqaüdünün aylıq məbləği 2019-cu il fevralın 1-dən 300 manata çatdırılır.
Novator.az bildirir ki, şəhid ailəsi üçün prezident təqaüdü 2006-cı ildə təsis edilib. Təqaüdün ilkin məbləği 100 manat olub. 2010-cu ildə məbləğ 150 manata, 2011-ci ildə 165 manata, 2013-cü ildə 200 manata, 2016-cı ildə 220 manata qaldırılıb.
2018-ci il martın 1-də təqaüdün məbləği 242 manat idi.
Prezident İlham Əliyevin 2018-ci il aprelin 19-da və 2019-cu il yanvarın 28-də imzaladığı fərmanlarla 1997-ci ilin avqust ayının 2-dək şəhid olmuş 12268 nəfərin vərəsələrinə 11 min manat birdəfəlik ödəmə verilir.
1997-ci il avqustun 2-də “Hərbi qulluqçuların dövlət icbari şəxsi sığortası haqqında” qanun qüvvəyə minib və həmin dövrdən sonra hərbi qulluqçuların həlak olması, itkin düşməsi və ya xəsarət alması zamanı sığorta ödənişlərinin verilməsi həyata keçirilib.
