Ön xətdə mükafat
Mod.gov.az-ın 31 yanvar məlumatına görə, Müdafiə Nazirliyinin rəhbər heyəti cəbhə zonasında yerləşən hərbi hissələrə və döyüş mövqelərinə baş çəkərək şəxsi heyətlə görüşüb.
Döyüş növbəsi çəkən şəxsi heyətlə bir araya gələn nazir Zakir Həsənov müdafiənin dayanıqlığını, hərbi qulluqçuların döyüş və mənəvi-psixoloji hazırlığını yoxlayıb, komanda-müşahidə məntəqəsindən düşmən mövqelərini izləyib.
Zakir Həsənov ön xətt bölmələrində xidmət edən şəxsi heyətin sosial-məişət şəraitinin daha da yaxşılaşdırılması istiqamətində həyata keçirilən işlərlə maraqlanıb və bu tədbirlərin daha da keyfiyyətlə yerinə yetirilməsi ilə bağlı müvafiq tapşırıqlar verib.
Şəxsi heyətin döyüş və mənəvi-psixoloji hazırlığını yüksək qiymətləndirən müdafiə naziri xidmətdə fərqlənən bir qrup hərbi qulluqçunu mükafatlandırıb.
