Mehman Hüseynov səbirsizliklə gözləyir
Yanvarın 30-da ailə üzvləri Bakı İstintaq Təcridxanasında bloqçu Mehman Hüseynovla görüşüblər.
Bu, Mehmana qarşı yeni cinayət işinə xitam veriləndən sonra yaxınlarının onunla ilk görüşüdür.
Məhbus bloçunun mühacirətdə olan qardaşı Emin Hüseynov “Turan”a deyib ki, Mehmanın səhhəti qaydasına düşür, o, azadlığa çıxacağı günü səbirsizliklə gözləyir.
Qardaşının sözlərinə görə, Mehman azadlığa çıxandan sonra səhhətini tam bərpa etmək və gündəlik işinə başlamaq niyyətindədir.
Mehman Hüseynov 2017-ci il martın 3-dən həbsdədir. O, polisə ağır cinayət ittihamı ilə böhtan atmaqda təqsirli bilinərək 2 il müddətinə azadlıqdan məhrum olunub.
2018-ci il dekabrın 26-da Mehman Hüseynova Cinayət Məcəlləsinin 315.2-ci maddəsi (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmə) ilə yeni cinayət işi açılıb.
Yeni cinayət işinin istintaqı ilə əlaqədar məhbus bloqçu dekabrın sonlarında 14 saylı Cəzaçəkmə Müəssisəsindən Bakı İstintaq Təcridxanasına köçürülüb.
Müdafiəçiləri deyirlər ki, Mehman Hüseynov həmin il dekabrın 26-da quru aclığa başlayıb, sonradan bir neçə gün aksiyanı qismən qida qəbul etməklə davam etdirib və bütün bunlar onun səhhətinə mənfi təsir göstərib. Penitensiar Xidmət bloqçunun aclıq aksiyası keçirdiyini təkzib edib.
2019-cu il yanvarın 22-də Baş Prokurorluq prezident İlham Əliyevin təklifini nəzərə alaraq Mehman Hüseynova qaldırılmış ikinci cinayət işinin icraatına xitam verib.
