Vaşinqtondan zəng
Prezidentin mətbuat xidməti məlumat yayıb. Qeyd olunur ki, yanvarın 29-u axşam ABŞ prezidentinin milli təhlükəsizlik məsələləri üzrə müşaviri Con Bolton dövlət başçısı İlham Əliyevə zəng edib: “Söhbət zamanı qarşılıqlı maraq doğuran bir sıra məsələlər, o cümlədən enerji təhlükəsizliyi, təhlükəsizlik sahəsində əməkdaşlıq və Dağlıq Qarabağ münaqişəsi ilə bağlı Ermənistan-Azərbaycan danışıqları müzakirə edilib”.
Novator.az xatırladır ki, prezident İlham Əliyev yanvarın 22-si İsveçrənin Davos şəhərində Ermənistanın baş naziri Nikol Paşinyanla bir araya gəlib. Saat yarıma yaxın çəkən görüşdə Dağlıq Qarabağ münaqişəsinin nizamlanmasına dair danışıqlar prosesinin vəziyyəti müzakirə edilib”.
Görüşdən bir gün sonra – yanvarın 23-də Nikol Paşinyanın Con Boltonla telefon söhbəti olub.
Ötən ilin payızında Con Bolton Qafqaza səfər edərək bir çox məsələnin, o cümlədən Dağlıq Qarabağ münaqişəsinin müzakirəsini aparıb. Oktyabrın 24-də o, Bakıda prezident İlham Əliyevlə bir araya gəlib. Ertəsi gün Ermənistanın paytaxtı Yerevana səfər edən Con Bolton hökumət başçısı Nikol Paşinyanla görüşüb. Jurnalistlə açıqlamasında Con Bolton deyib ki, Ermənistan üçün xarici təzyiqləri azaltmağın ən yaxşı yolu Dağlıq Qarabağ münaqişəsinin həllidir.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ildə atəşkəslə dayanan müharibədə Ermənistan Dağlıq Qarabağ bölgəsini (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları), eləcə də Qazax rayonunun 7, Naxçıvan Muxtar Respublikasının 1 kəndini işğal edib.
Dağlıq Qarabağ münaqişəsinin dinc yolla tənzimlənməsi ilə 1992-ci ildə yaradılan ATƏT-in Minsk qrupu məşğul olur. Bu quruma ABŞ, Fransa, Rusiya (həmsədrlər), Türkiyə, Belarus, İtaliya, Almaniya, İsveç, Finlandiya, eləcə də Azərbaycanla Ermənistan daxildir.
