Son beş ildə ilk dəfə: Azərbaycanda qızılcaya tutulanlar var
Son beş ildə ilk dəfə olaraq Azərbaycanda qızılca xəstəliyi qeydə alınmağa başlayıb.
Novator.az-ın məlumatına görə, Səhiyyə Nazirliyi mətbuat xidmətinin yanvarın 29-da yaydığı açıqlamada deyilir ki, qızılca xəstəliyinə ölkəmizdə əsasən 20-40 yaşlı, vaxtilə peyvənd olunmamış adamlar tutulub.
Açıqlamada vurğulanır ki, xəstəliyin yayılmasının qarşısını almaq üçün Səhiyyə Nazirliyi uşaqların tam peyvəndlə əhatə olunması işlərini gücləndirməyi və qızılca xəstəliyi ilə bağlı bütün şübhəli hadisələri araşdırmağı tapşırıb: “Bundan əlavə hər hansı səbəbdən peyvənd almayan əhalinin vaksinasiyası üçün yaxın zamanda əlavə peyvənd tədbirlərinin aparılması nəzərdə tutulur. Bu məqsədlə nazirlik 160 min doz peyvənd alınmasını sifariş verib”.
2013-cü ildən Azərbaycanda qızılca xəstəliyinə tutulan olmurdu.
Səhiyyə Nazirliyinin mətbuat xidməti bildirir ki, 2018-ci ildə Avropanın əksər ölkəsində, o cümlədən Gürcüstanda qızılca alovlanıb. Həmin ilin sonundan Azərbaycanda da bu xəstəlik qeydə alınmağa başlayıb.
Mətbuat xidmətinin açıqlamasında qızılcanın Azərbaycana xaricdən gətirildiyinə işarə edilir və bu xəstəliklə əlaqədar epidemioloji vəziyyətin nəzarətdə olduğu vurğulanır.
