Neftin 29 yanvar qiymətləri
Yanvarın 29-u London birjasında brent markalı neftin bir barreli 60,29 dollara, Nyu-York birjasında layt markalı neftin bir barreli 52,35 dollara yüksəlib.
Azərbaycan neftinin qiyməti isə düşüb. AZƏRTAC xəbər verir ki, “AzəriLayt” markalı neftin bir barreli 61,48 dollara satılır.
Novator.az bildirir ki, Azərbaycanın 2019-cu il büdcəsində neftin qiyməti 60 dollardan götürülüb. “AzəriLayt” 2019-cu ilə 57,19 dollarla start verib.
Ötən həftə Davosda “Rossiya 1” telekanalına verdiyi müsahibədə prezident İlham Əliyev neft bazarında vəziyyətin OPEK+ formatında birləşən ölkələr arasında razılıqların necə yerinə yetirilməsindən asılı olacağını vurğulayıb: “Azərbaycan zəruri tədbirləri görüb, neft hasilatının azaldılması ilə bağlı öhdəliklər götürüb və biz bu öhdəlikləri icra edirik. Bütün ölkələr bu məsələyə məsuliyyətlə yanaşsalar, onda yəqin ki, qiymət bugünkü səviyyədə qalacaq. Bu, barrelə görə 60-70 dollar deməkdir.
Bütün il üçün proqnozlaşdırmaq çox çətindir, amma əksər təhlilçilərin qiymətləndirməsinə görə, təxminən bu səviyyə real ola bilər. Bu həm şirkətlər, həm ixracatçı ölkələr, həm də istehlakçılar üçün daha məqbuldur”.
İri neft ixracatçılarını birləşdirən OPEK və bir neçə qeyri-OPEK ölkəsi neft hasilatının 2018-ci ilin oktyabr ayı səviyyəsindən gündəlik 1,2 milyon barrel azaldılmasına razılaşıb. Qərara əsasən, OPEK üzvləri 2019-cu ilin yanvarından neft hasilatını sutkada 800 min barrel, digər ölkələr 400 min barrel azaldır. Azərbaycan hasilatı 20 min barrel azaldaraq 763 min barrel həcmində saxlamağa söz verib.
