Ekspertdən proqram təklifi
2004-2018-ci illərdə Azərbaycan regionlarının sosial-iqtisadi inkişafı üzrə üç dövlət proqramı icra olunub. İqtisadçı Rövşən Ağayev mümkün dördüncü proqram üçün tam fərqli format təklif edir. Novator.az-ın məlumatına görə, ekspert yazır ki, hər bir iqtisadi region üzrə ayrıca proqram işlənməli və proqramlarda bu məsələlər əks olunmalıdır: regionun spesifikası nəzərə alınmaqla fürsətlər, təhdidlər, zəif və güclü tərəflər (SWOT analiz); siyasi, hüquqi, iqtisadi, sosial, texnoloji və institusional mühit amilləri (PESTLE analiz); hədəflər, hədəflərə yönəlmiş fəaliyyətlər, hədəflərə çatmanı ölçmək üçün yekun göstəricilər; hər bir fəaliyyət üzrə tələb olunan resurslar: “Məhz bu standartlara uyğun hazırlanacaq regional inkişaf proqramları yeni dövrün tələblərinə uyğun proqramlar sayıla bilər. Həm də proqramlar bütün maraqlı tərəflərin – vətəndaş cəmiyyəti və medianın, ixtisaslaşmış ekspertlərin, biznes icmasının geniş və ortaq müzakirəsinin yekunu kimi ortaya çıxmalıdır”.
Rövşən Ağayev şərhinə büdcə gəlirlərinin adambaşına həcminə görə statistika da əlavə edib. İlk beşlikdə Naftalan şəhəri (415 manat), Mingəçevir şəhəri (205 manat), Abşeron (195 manat), İmişli (177 manat) və Qəbələ rayonları (142 manat) yer alır.
Son beşlikdə Ucar (45 manat), Masallı (43 manat), Goranboy (42 manat), Cəlilabad (36 manat) və Yardımlı (33 manat) rayonları göstərilir.
