Ümumi təhsil qanunu yeni mərhələdə
Milli Məclisin elm və təhsil komitəsinin 24 yanvar iclasında “Ümumi təhsil haqqında” qanun layihəsi ikinci oxunuşda müzakirə olunub. AZƏRTAC-ın məlumatına görə, qanun layihəsini təqdim edən komitə sədri İsa Həbibbəyli bildirib ki, sənəd 5 fəsil, 33 maddədən ibarətdir.
Qanun layihəsinə əsasən, dövlət, bələdiyyə, Azərbaycan Respublikasının və xarici dövlətlərin hüquqi şəxsləri, Azərbaycan vətəndaşları, əcnəbilər və vətəndaşlığı olmayan şəxslər ümumi təhsil müəssisəsinin təsisçisi ola bilər.
Ümumi təhsil müəssisəsində təhsil alanlar üçün Təhsil Nazirliyinin müəyyənləşdirdiyi geyim formaları tətbiq olunacaq.
Novator.az bildirir ki, layihəyə görə, ümumi təhsilin səviyyələri bunlardır: məktəbəhazırlıq mərhələsi (5 yaş); ibtidai təhsil I-IV siniflər (6-10 yaş); ümumi orta təhsil V-IX siniflər (11-15 yaş); tam orta təhsil X-XI siniflər (16-17 yaş).
Ümumi təhsil müəssisələrinin bu növləri var: ibtidai ümumtəhsil məktəbi; ümumi orta ümumtəhsil məktəbi; tam orta ümumtəhsil məktəbi; lisey; gimnaziya; ümumtəhsil internat məktəbi; inteqrasiya təlimli internat tipli təhsil müəssisəsi; xüsusi məktəb və xüsusi internat məktəbi; inteqrasiya təlimli internat tipli gimnaziya; valideyn himayəsindən məhrum uşaqlar üçün ümumtəhsil internat məktəbi; digər məktəblər.
Layihəyə əsasən, ümumi təhsil müəssisələrində tədris dili dövlət dili – Azərbaycan dilidir. Azərbaycan dilinin üstünlüyünü təmin etmək şərti ilə digər dillərdə də tədris aparıla bilər. Belə ümumi təhsil müəssisələrində Azərbaycan dili, ədəbiyyatı, tarixi və coğrafiyası tədris olunmalıdır.
İbtidai təhsil 6 yaşdan başlanır. Valideynlərin və ya digər qanuni nümayəndələrin müraciəti ilə hər təqvim ilinin sonunadək 6 yaşı tamam olan uşaqlar da məktəbə qəbul edilirlər.
