Qiyabi hökm
Ukrayna paytaxtı Kiyevin Obolon Rayon Məhkəməsi yanvarın 24-ü axşam sabiq prezident Viktor Yanukoviçi dövlətə xəyanətdə təqsirli bilərək 13 il müddətinə azadlıqdan məhrum edib. Qiyabi hökmə əsasən, Viktor Yanukoviç 2014-cü ildə Rusiyaya qaçdıqdan sonra həmin ölkənin rəhbərliyini Ukraynaya qoşun yeritməyə çağırıb. Məhkəmə Viktor Yanukoviçin prosesə çəkilən 98 min qrivnanı ödəməsinə də hökm edib.
Viktor Yanukoviç 1950-ci ildə anadan olub. Donetsk Politexnik İnstitutunu və Ukrayna Xarici Ticarət Akademiyasını bitirib. 1997-2002-ci illərdə Donetsk Vilayəti Dövlət Administrasiyasının sədri olub. 2002-ci ildən başlayaraq üç dəfə baş nazir postunu tutub. 2010-cu ilin fevral ayında prezident seçilib.
2014-cü il fevralın 22-də parlament Viktor Yanukoviçi prezident postundan uzaqlaşdırıb və o, ölkədən qaçaraq Rusiyaya sığınıb.
Hakimiyyət xalq üsyanı ilə dəyişəndən, Rusiyaya yaxın qüvvələri Qərb meylli qüvvələr əvəzləyəndən dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib.
