Qırğın səngimir
Venesuelada bu həftə dərinləşən siyasi böhran qırğına gətirib çıxarıb. Paytaxt Karakasda və başqa şəhərlərdə prezident Nikolas Maduronun istefası tələbi ilə keçirilən aksiyalar hökumət qüvvələri ilə toqquşmalarla müşayiət olunur. Yanvarın 25-i səhərə olan məlumatlara görə, 25-dən çox ölən, 370-ə yaxın tutulan var.
Novator.az bildirir ki, Venesuela Vahid Sosialist Partiyasının lideri olan 1962-ci il təvəllüdlü Nikolas Maduro 2013-cü ildən ölkə prezidentidir. O, ötən il mayın 20-də keçirilmiş prezident seçkisində yenidən dövlət başçısı elan olunub, bu il yanvarın 10-da and içərək səlahiyyətlərinin icrasına başlayıb.
Müxalif qüvvələrin əlində olan, prezidentin tanımadığı parlamentin sədri Xuan Quaido yanvarın 23-də özünü müvəqqəti prezident elan edib. ABŞ, Argentina, Braziliya, Kolumbiya, Çili, Paraqvay, Peru, Kanada, Kosta Rika, Qvatemala, Honduras, Panama və Gürcüstan onu legitim dövlət başçısı kimi tanıyıb. Nikolas Maduro hakimiyyətdən əl çəkmək çağırışlarına məhəl qoymur. O, 2025-ci ilə kimi prezident postunda qalacağını bəyan edir, baş verənləri dövlət çevrilişinə cəhd adlandırır.
