Milli Şuranın rəhbərləri
Novator.az Demokratik Qüvvələrin Milli Şurasının fəaliyyətinə rəhbərlik edən Koordinasiya Mərkəzinin tərkibinə nəzər salıb.
2013-cü ildə yaradılmış Milli Şuraya Cəmil Həsənli sədrlik edir. 1952-ci il təvəllüdlü Cəmil Həsənli tarix elmləri doktorudur. Bakı Dövlət Universitetində müəllim, baş müəllim, dosent, professor vəzifələrində çalışıb.
1993-cü ildə (aprel-sentyabr) Azərbaycan Respublikası prezidentinin müşaviri vəzifəsini tutub. AXCP sədrinin müavini olub, 2000 və 2005-ci illərdə Milli Məclisin deputatı seçilib. 2013-cü ildə Milli Şuranın namizədi kimi prezident seçkisində iştirak edib.
Cəmil Həsənli Milli Şuranın fəaliyyətinə rəhbərlik edən Koordinasiya Mərkəzinin üzvüdür.
Koordinasiya Mərkəzində AXCP sədri Əli Kərimli də təmsil olunur. 1965-ci il təvəllüdlü Əli Kərimli Bakı Dövlət Universitetinin hüquq fakültəsini bitirib. 1991-ci ildən “Azadlıq” qəzetinin əməkdaşı olub.
Əbülfəz Elçibəyin hakimiyyəti zamanı əvvəl Prezident Aparatının ərazi idarəetmə orqanları ilə iş şöbəsinin müdiri, sonra dövlət katibi vəzifəsində çalışıb.
1993-cü ildən AXC sədrinin siyasi məsələlər üzrə müavini, daha sonra AXCP sədrinin birinci müavini olub. 1995 və 2000-ci illərdə Milli Məclisin deputatı seçilib. 2000-ci ildən AXCP-yə rəhbərlik edir.
Milli Şuranın Koordinasiya Mərkəzində AXCP-dən daha üç nəfər var: Vahid Məhərrəmli, Rahim Hacıyev, Gözəl Bayramlı. Rahim Hacıyev hazırda mühacirətdə, Gözəl Bayramlı həbsdədir.
Müsavat Partiyasından Tofiq Yaqublu, Vətəndaş Həmrəyliyi Partiyasından Rafiq Manaflı, Qarabağ Uğrunda İslami Müqavimət Hərəkatından Rövşən Əhmədli də Milli Şuranın Koordinasiya Mərkəzində yer alırlar.
Qurumun digər üzvləri bunlardır: sabiq deputatlar İbrahim İbrahimli, Gültəkin Hacıbəyli, hüquqşünaslar Namizəd Səfərov, Vidadi Mirkamal, Fuad Ağayev, jurnalist Mehman Əliyev, hüquq müdafiəçisi Oqtay Gülalıyev, ssenarist və kinodramaturq Eldəniz Quliyev, sabiq dövlət məmuru Nurəddin Mustafayev.
