Venesuela: prezidenti aşırdırlar
Venesuelada gərginlik artır. Prezident Nikolas Maduronun istefası tələbi ilə keçirilən davamlı aksiyalar paytaxt Karakasda və başqa şəhərlərdə hökumət qüvvələri ilə böyük toqquşmalara gətirib. 20-yə yaxın ölən var.
Novator.az bildirir ki, 1962-ci il təvəllüdlü Nikolas Maduro Venesuela Vahid Sosialist Partiyasının lideridir. Parlament sədri, xarici işlər naziri, vitse-prezident postlarını tutub. 2013-cü ildən ölkə prezidentidir. O, ötən il mayın 20-də keçirilmiş prezident seçkisində yenidən dövlət başçısı elan olunub, bu il yanvarın 10-da and içərək səlahiyyətlərinin icrasına başlayıb.
Müxalif qüvvələrin əlində olan parlamentin sədri Xuan Quaido yanvarın 23-də özünü müvəqqəti prezident elan edib. ABŞ başda olmaqla bir çox Qərb ölkəsi onu legitim dövlət başçısı kimi tanıyıb və Nikolas Maduronu hakimiyyətdən əl çəkməyə çağırıb. Nikolas Maduro çağırışlara məhəl qoymur.
