Rəsmi namizədlərin sayı 13-ə çatdı
Ukraynanın Mərkəzi Seçki Komissiyası Ali Radanın deputatı, Müxalif Blok Partiyasının üzvü Yuri Boykonun prezidentliyə namizədliyini qeydə alıb. Qərar yanvarın 22-də verilib.
Novator.az-ın məlumatına görə, martın 31-də keçiriləcək prezident seçkisinə daha əvvəl bu şəxslər buraxılıb: sabiq ekologiya və təbii sərvətlər naziri İqor Şevçenko, Lvov şəhərinin meri, Samopomoş Partiyasının lideri Andrey Sadovıy, Ədalət Hərəkatı Partiyasının lideri Valentin Nalivayçenko, Sosial Demokrat Partiyasının lideri Sergey Kaplin, müstəqil namizəd Vitali Skotsik, Vətəndaş Mövqeyi Partiyasının lideri Anatoli Qritsenko, Bizimkilər Partiyasının lideri Yevgeni Murayev, deputatlar Vitali Kupriy, Olqa Boqomolets, Aleksandr Şevçenko, biznesmen Gennadi Balaşov, iqtisadçı Roman Nəsirov.
35 yaşa çatan, son 10 ildə Ukraynada daimi yaşayan və dövlət dilini bilən ölkə vətəndaşları prezidentliyə namizəd ola bilər. Prezidentliyə iddiaçılar 2,5 milyon qrivna (150 min manat) girov da qoymalıdır. Prezident seçilə və ya ikinci tura çıxa bilməyən şəxsin seçki girovu dövlət büdcəsinə köçürülür.
Namizədlərin irəli sürülməsi prosesi fevralın 3-də bitəcək.
Hazırda prezident postunu Pyotr Poroşenko tutur. O, 2014-cü il mayın 25-də Ukrayna prezidenti seçilib.
