Seçki yarışında yeni şəxslər
Ukraynada prezidentliyə namizədlərin sayı 12-yə çatıb. Novator.az-ın məlumatına görə, yanvarın 21-də Ali Radanın deputatı Aleksandr Şevçenkonun və iqtisadçı Roman Nəsirovun namizədlikləri rəsmiləşib.
Aleksandr Şevçenkonun namizədliyini Ukrayna Vətənpərvərlər Birliyi Partiyası irəli sürüb, Roman Nəsirov isə müstəqil namizəddir.
Mərkəzi Seçki Komissiyası martın 31-də keçiriləcək prezident seçkisinə daha əvvəl 10 iddiaçını buraxıb: sabiq ekologiya və təbii sərvətlər naziri İqor Şevçenko, Lvov şəhərinin meri, Samopomoş Partiyasının lideri Andrey Sadovıy, Ədalət Hərəkatı Partiyasının lideri Valentin Nalivayçenko, Sosial Demokrat Partiyasının lideri Sergey Kaplin, müstəqil namizəd Vitali Skotsik, Vətəndaş Mövqeyi Partiyasının lideri Anatoli Qritsenko, Bizimkilər Partiyasının lideri Yevgeni Murayev, deputatlar Vitali Kupriy, Olqa Boqomolets, biznesmen Gennadi Balaşov.
35 yaşa çatan, son 10 ildə Ukraynada daimi yaşayan və dövlət dilini bilən ölkə vətəndaşları prezidentliyə namizəd ola bilər. Prezidentliyə iddiaçılar 2,5 milyon qrivna (150 min manat) girov da qoymalıdır. Prezident seçilə və ya ikinci tura çıxa bilməyən şəxsin seçki girovu dövlət büdcəsinə köçürülür.
Namizədlərin irəli sürülməsi prosesi fevralın 3-də bitəcək.
Hazırda prezident postunu Pyotr Poroşenko tutur. O, 2014-cü il mayın 25-də Ukrayna prezidenti seçilib.
