Hərrac qiymətləri qaldırdı
Əmlak Məsələləri Dövlət Komitəsi 22 yanvar hərracından rəsmi məlumat yayıb. Xəbərə görə, hərracda rəqabət yaradan dövlət əmlaklarından biri Bakının Yasamal rayonunun Həsən bəy Zərdabi prospektindəki qeyri-yaşayış sahəsidir. Ümumi faydalı sahəsi 32,8 kvadratmetr olan obyektin hərracında rəqabət qiyməti 2 dəfədən çox yüksəldib. 4 min manat qiymət təyin olunmuş əmlak 10 min 500 manata özəlləşdirilib.
Vətəndaş marağına səbəb olan digər qeyri-yaşayış sahəsi paytaxtın Suraxanı rayonunun Qaraçuxur qəsəbəsindədir. Ümumi faydalı sahəsi 147 kvadratmetr olan dövlət obyektinin hərrac qiyməti 25 min manat göstərilib, sonda 30 min 750 manat təklif edilib.
Komitənin yanvarın 29-da keçirəcəyi hərraca ümumilikdə 79 dövlət əmlakı çıxarılıb. Onların 37-si kiçik dövlət müəssisə və obyekti, 14-ü qeyri-yaşayış sahəsi, 20-si səhmdar cəmiyyəti, 8-i nəqliyyat vasitəsidir.
