Davos səfəri sazişlə başlayıb
Prezident İlham Əliyevin Dünya İqtisadi Forumunun illik toplantısında iştirak etmək üçün İsveçrə Konfederasiyasına işgüzar səfəri başlayıb. AZƏRTAC xəbər verir ki, dövlət başçısı yanvarın 21-də Dünya İqtisadi Forumunun prezidenti Borge Brende ilə görüşüb.
Görüşdə Azərbaycan hökuməti və Dünya İqtisadi Forumunun Dördüncü Sənaye İnqilabı Mərkəzi arasında əməkdaşlığın təməli qoyulub. Bu məqsədlə İlham Əliyev və Borge Brende əməkdaşlıq sazişinin təntənəli mübadiləsini həyata keçiriblər.
Həmin gün İlham Əliyev “Rossiya 1” televiziya kanalına müsahibə verib, dünyada neftin qiymətinin vəziyyəti, beynəlxalq münasibətlər və digər məsələlərlə bağlı sualları cavablandırıb.
Çinin CGTN televiziya kanalına müsahibədə dövlət başçısı Azərbaycanda enerji sektorunun, iqtisadiyyatın müxtəlif sahələrinin inkişafına, ölkənin həyata keçirdiyi qlobal enerji və infrastruktur layihələrinə, Dağlıq Qarabağ münaqişəsinə, Azərbaycan-Çin ikitərəfli münasibətlərinə və digər məsələlərə toxunub.
