Bir ildə 1 milyon 21 min manat cərimə kəsilib
Dövlət Statistika Xidməti ətraf mühitlə bağlı rəqəmlər yayıb. Novator.az-ın məlumatına görə, hesabatda qeyd olunur ki, 2019-cu ilin əvvəlinə ölkədə ümumi sahəsi 120,7 min hektar olan 11 dövlət təbiət qoruğu, sahəsi 421,4 min hektar olan 10 milli park və sahəsi 350,8 min hektar olan 24 dövlət təbiət yasaqlığı olub. Xüsusi mühafizə olunan təbiət əraziləri ölkə ərazisinin 10,3 faizini təşkil edir.
Ekologiya və Təbii Sərvətlər Nazirliyinin monitorinq xidmətləri 2018-ci ildə 1577 müəssisədə müvafiq müayinələr aparıb. Su hövzələrinin çirkləndirilməsi üzrə tədqiq olunmuş müəssisələrin 37,8 faizində, atmosfer havasının çirkləndirilməsi üzrə tədqiq olunmuş müəssisələrin 43,2 faizində, torpaq ehtiyatlarının çirkləndirilməsi üzrə müayinəyə cəlb olunmuş müəssisələrin 26,5 faizində atılan tullantıların icazə verilən həddən artıq olması qeydə alınıb.
Təbiəti mühafizə qanunvericiliyinin pozulmasına görə ötən il inzibati məsuliyyətə cəlb olunmuş 968 nəfər vəzifəli şəxs və vətəndaşlardan 1 milyon 21 min manat məbləğində cərimə tutulub.
