Ermənistan hökumətində yeni təyinatlar
Ermənistan prezidenti Armen Sərkisyan baş nazir Nikol Paşinyanın təqdimatına baxaraq hökumət üzvlərinin təyinatını rəsmiləşdirib. Novator.az-ın məlumatına görə, Zöhrab Mnasakanyan xarici işlər naziri, David Tonoyan müdafiə naziri, Artak Zeynalyan ədliyyə naziri, Feliks Solakyan fövqəladə hallar naziri, Atom Cancuqazyan maliyyə naziri, Tiqran Xaçatryan iqtisadi inkişaf və investisiyalar naziri, Akob Arşakyan nəqliyyat, rabitə və informasiya texnologiyaları naziri, Suren Papikyan ərazi idarəçiliyi və inkişafı naziri, Arsen Torosyan səhiyyə naziri, Araik Arutyunyan elm və təhsil naziri, Erik Qriqoryan təbiəti mühafizə naziri postlarında qalıblar.
Əmək və sosial məsələlər naziri yenidir: Zarui Batoyan.
Yanvarın 14-də yenidən Ermənistanın baş naziri təyin olunan Nikol Paşinyanın hökumətində iki şəxsin təyinatı daha əvvəl rəsmiləşib: Tiqran Avinyan və Mger Qriqoryan baş nazirin müavini postlarında saxlanıblar.
Hazırda Ermənistan hökuməti 17 nazirlikdən ibarətdir. Planlaşdırılan yeniliyə əsasən, Diaspor; Xarici İşlər nazirlikləri, Mədəniyyət; Gənclər və İdman; Elm və Təhsil nazirlikləri, İqtisadi İnkişaf və İnvestisiyalar; Kənd Təsərrüfatı nazirlikləri birləşdirilir.
Nəqliyyat, Rabitə və İnformasiya Texnologiyaları; Enerji İnfrastrukturu və Təbii Sərvətlər; Ərazi İdarəçiliyi və İnkişafı nazirliklərinin bazasında Ərazi İdarəçiliyi; Yüksək Texnologiyalar və Hərbi Sənaye nazirlikləri yaratmaq nəzərdə tutulur.
1975-ci il təvəllüdlü Nikol Paşinyan Vətəndaş Sazişi Partiyasının lideridir. O, 2018-ci il mayın 8-də baş nazir postuna gətirilib. Ötən il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku 132 deputatlıq parlamentə 88 mandat qazanaraq hökumət qurmaq hüququ əldə edib.
