Temperatur mənfi 13 dərəcəyə düşüb
Azərbaycanın şimal rayonlarına qar yağması ilə əlaqədar dağlıq ərazilərdə temperatur mənfi 13 dərəcəyədək aşağı düşüb.
Şimal-Şərq Regional Hidrometeorologiya Mərkəzindən AZƏRTAC-a bildiriblər ki, ən aşağı temperatur Quba rayonunun Xınalıq kəndində qeydə alınıb.
Quba, Qusar və Xızı rayonlarının dağlıq ərazilərində qarın qalınlığı 10 santimetri ötüb.
Ən çox yağıntı Qusarın Ləzə, Qubanın Qırız, Təngəaltı, Xaltan, Xınalıq kəndlərində və Xızının Altıağac qəsəbəsində qeydə alınıb. Altıağac qəsəbəsində 11 santimetr qar var.
Quba və Qusarın rayon mərkəzində isə qarın qalınlığı 2-5 santimetrə çatır.
Ekologiya və Təbii Sərvətlər Nazirliyinin Milli Hidrometeorologiya Departamenti xəbər verir ki, yanvarın 17-dən 18-i səhərədək ölkədə yağış yağıb, bəzi yerlərdə sulu qara, qara keçib, bəzi şərq rayonlarında intensiv olub. Bakıda və Abşeron yarımadasında şimal-qərb küləyi şiddətlənib.
Düşən yağıntının maksimum miqdarı Lənkəran-Astara zonasında 26, Mərkəzi-Aran rayonlarında 18, Bakıda və Abşeron yarımadasında 9, Böyük Qafqazda 15, Qazax-Gəncə zonasında 8, Kiçik Qafqazda 4, Naxçıvan Muxtar Respublikasında 5 millimetr təşkil edib.
Qarın qalınlığı Ağdərədə 40, Kişçay və Qırızda 15, Altıağacda 11, Kirən və Xınalıqda 10, Qaxmuğal və Şahdağda 7, Xaltan və Sarıbaşda 6, Şahbuz və Qusarda 5, Yardımlıda 4, Quba və Mərəzədə 2, İsmayıllı və Daşkəsəndə 1 santimetr olub.
