Gömrüyün cəza rəqəmləri
Gömrük pozuntularının 2018-ci il statistikası açıqlanıb. Novator.az bildirir ki, Dövlət Gömrük Komitəsinin illik hesabatına görə, gömrük orqanları 518 qaçaqmalçılıq faktı, 252 narkotik vasitələrin və psixotrop maddələrin qanunsuz dövriyyəsi faktı, 33 aksiz markası olmadan mal idxal etmə faktı, 12 gömrük ödənişindən yayınma faktı, 184 digər cinayət xarakterli fakt qeydə alıb.
Hesabat dövrü ərzində gömrük hüquqpozmalarında 802 şəxs təqsirləndirilib, 8921 inzibati xəta faktı ortaya çıxarılıb.
Dövlət Gömrük Komitəsinin sədri Səfər Mehdiyev Nazirlər Kabinetinin 11 sentyabr iclasında bildirib ki, 2018-ci ildə ölkə ərazisinə gətirilən mallara və nəqliyyat vasitələrinə gömrük nəzarəti daha da gücləndirilib, gömrük qaydalarının pozulmasına qarşı mübarizə tədbirləri genişləndirilib. Onun sözlərinə görə, gömrük nəzarətindən gizlədilərək gömrük sərhədindən keçirilməsinə cəhd edilmiş qaçaqmalçılıq predmeti olan malların ümumi dəyəri 107 milyon manat olub, 416 milyon manatdan çox imtiyaz hüququ olmayan malların güzəştli qaydada gömrük rəsmiləşdirilməsindən keçirilməsi cəhdlərinin qarşısı alınıb: “Xidməti fəaliyyəti zamanı aşkar edilmiş korrupsiya faktları və bu faktların obyekti olan 117 nəfər gömrük əməkdaşı tutduğu vəzifədən azad edilib. Mövcud faktlara hüquqi qiymətin verilməsi üçün 17 gömrük əməkdaşı barəsində açılan cinayət işi üzrə istintaq materialları Baş Prokurorluğa göndərilib”.
