Büdcənin gəlir-çıxarı açıqlanıb
Azərbaycanın Maliyyə Nazirliyi 2018-ci ilin dövlət büdcəsinin icrasına dair məlumat yayıb. Hesabata görə, dövlət büdcəsinin mədaxili 22 milyard 411,3 milyon manat, xərcləri 22 milyard 718,9 milyon manat həddində rəsmiləşib.
Gəlirlər proqnoza qarşı 101,2 faiz icra olunub. Vergilər Nazirliyinin xətti ilə 7 milyard 417,6 milyon manat, Dövlət Gömrük Komitəsinin xətti ilə 3 milyard 434,4 milyon manat vəsait gəlib, Dövlət Neft Fondundan büdcəyə 10 milyard 959 milyon manat vəsait köçürülüb.
Dövlət büdcəsindən maliyyələşdirilən təşkilatların ödənişli xidmətlərindən 466,4 milyon manat əldə edilib.
Digər daxilolmalar 134,3 milyon manat göstərilir.
2018-ci ildə dövlət büdcəsinin xərcləri 98,4 faiz icra edilib. Xərclərin 50,8 faizi cari xərclərə, 39,4 faizi əsaslı xərclərə, 9,8 faizi dövlət borcuna və öhdəliklərinə xidmətlə bağlı xərclərə yönəldilib.
Dövlət büdcəsi xərclərinin 31,7 faizi sosial təyinatlı xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib.
Büdcə kəsiri 307,6 milyon manat olub. Kəsirin 222,6 milyon manatı dövlət istiqraz vərəqələrinin satışı, 101,2 milyon manatı özəlləşdirmədən daxil olan vəsaitlər hesabına örtülüb.
