1+2. Ardı var
Yanvarın 14-də yenidən Ermənistanın baş naziri təyin olunan Nikol Paşinyanın hökumətində iki şəxsin təyinatı rəsmiləşib. Novator.az-ın məlumatına görə, yanvarın 16-da Tiqran Avinyan və Mger Qriqoryan baş nazirin müavini postlarında saxlanıblar.
Nikol Paşinyan yanvarın 17-də bəyan edib ki, nazirlər mərhələli şəkildə təyin olunacaq və proses hökumətin ixtisarından sonra başa çatacaq. Plana görə, baş nazirin birinci müavini vəzifəsi ləğv olunur, nazirliklərin sayı 17-dən 12-yə düşür.
Hazırda Zöhrab Mnasakanyan xarici işlər naziri, David Tonoyan müdafiə naziri, Artak Zeynalyan ədliyyə naziri, Feliks Solakyan fövqəladə hallar naziri, Atom Cancuqazyan maliyyə naziri, Tiqran Xaçatryan iqtisadi inkişaf və investisiyalar naziri, Geqam Gevorqyan kənd təsərrüfatı naziri, Akob Arşakyan nəqliyyat, rabitə və informasiya texnologiyaları naziri, Qaregin Baqramyan enerji infrastrukturu və təbii sərvətlər naziri, Suren Papikyan ərazi idarəçiliyi və inkişafı naziri, Arsen Torosyan səhiyyə naziri, Araik Arutyunyan elm və təhsil naziri, Qabriel Kazaryan gənclər və idman naziri, Erik Qriqoryan təbiəti mühafizə naziri səlahiyyətlərini icra edirlər.
1975-ci il təvəllüdlü Nikol Paşinyan Vətəndaş Sazişi Partiyasının lideridir. O, 2018-ci il mayın 8-də baş nazir postuna gətirilib. Ötən il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku 132 deputatlıq parlamentə 88 mandat qazanaraq hökumət qurmaq hüququ əldə edib.
