Qarabağ Komitəsində sədr dəyişikliyi
Yanvarın 16-sı Bakıda, Qarabağ Azadlıq Təşkilatının ofisində Qarabağ Komitəsinin növbəti toplantısı keçirilib. Novator.az-ın məlumatına görə, iclasda sədrliyin Ümid Partiyası sədrinin müavini Taleh Əliyevə keçdiyi bəyan olunub.
Toplantının qərarına əsasən, yanvarın 24-ü Bakıda, Klassik Xalq Cəbhəsi Partiyasının qərargahında “Cəbhə xəttində atəşkəs rejiminin hərbi-siyasi və beynəlxalq-hüquqi vəziyyəti” mövzusunda dəyirmi masa keçiriləcək.
Bir qrup ictimai-siyasi xadimin ötən il yaratdığı Qarabağ Komitəsinə əvvəlcə Qarabağ Azadlıq Təşkilatının başçısı Akif Nağı, sonra müharibə veteranı, ictimai xadim İlham İsmayıl, onun ardınca isə Ağ Partiyanın başqanı Tural Abbaslı sədrlik edib.
Qurumun İdarə Heyətinə Pənah Hüseyn, İsgəndər Həmidov, Mirmahmud Mirəlioğlu, İlham İsmayıl, Akif Nağı, Tural Abbaslı, Əvəz Zeynallı, Sahib Kərimli, Taleh Əliyev daxildir.
