Prezidentliyə namizədlərin sayı 8-ə çatıb
Ukraynada martın 31-də keçiriləcək prezident seçkisinə qatılan daha 3 nəfərin namizədliyi rəsmən qeydiyyata alınıb. Novator.az-ın məlumatına görə, Mərkəzi Seçki Komissiyası Vətəndaş Mövqeyi Partiyasının lideri Anatoli Qritsenko, Bizimkilər Partiyasının lideri Yevgeni Murayev və deputat Vitali Kupriyə yaşıl işıq yandırıb.
Seçkiyə daha əvvəl 5 iddiaçı buraxılıb: sabiq ekologiya və təbii sərvətlər naziri İqor Şevçenko, Lvov şəhərinin meri, Samopomoş Partiyasının lideri Andrey Sadovıy, Ədalət Hərəkatı Partiyasının lideri Valentin Nalivayçenko, Sosial Demokrat Partiyasının lideri Sergey Kaplin və müstəqil namizəd Vitali Skotsik.
35 yaşa çatan, son 10 ildə Ukraynada daimi yaşayan və dövlət dilini bilən ölkə vətəndaşları prezidentliyə namizəd ola bilər. Prezidentliyə iddiaçılar 2,5 milyon qrivna (150 min manat) girov da qoymalıdır. Prezident seçilə və ya ikinci tura çıxa bilməyən şəxsin seçki girovu dövlət büdcəsinə köçürülür.
Namizədlərin irəli sürülməsi prosesi fevralın 3-də bitəcək.
Hazırda prezident postunu Pyotr Poroşenko tutur. O, 2014-cü il mayın 25-də Ukrayna prezidenti seçilib.
