AXCP-nin iki üzvünə inzibati həbs cəzası verildi
Yanvarın 16-sı Nəsimi Rayon Məhkəməsinin qərarı ilə AXCP-nin iki üzvü inzibati qaydada həbs olunub, üç üzvü cərimələnib.
Emil Səlimovla Nicat Abdullazadənin hər birinə 20 sutka inzibati həbs verilib. Nicat Nizamov, Şəmistan Həziyev və Emin Maniyevin hər biri 200 manat cərimə olunub.
“Amerikanın səsi” xəbər verir ki, cəbhəçilər İnzibati Xətalar Məcəlləsinin 535.1-ci (polisin qanuni tələbinə qəsdən tabe olmama) maddəsi ilə təqsirli biliniblər.
Adıçəkilən şəxslər yanvarın 15-də Bakı Ağır Cinayətlər Məhkəməsinin qarşısında tutulublar. Həmin gün Bakı Ağır Cinayətlər Məhkəməsində AXCP Ali Məclisi Rəyasət Heyətinin üzvü Aqil Məhərrəmli, partiyanın Nərimanov rayon şöbəsinin sədri Babək Həsənov, Gənclər Komitəsi Məclisinin sədri Ruslan Nəsirli, Gədəbəy Rayon İcra Hakimiyyətinin keçmiş başçısı Saleh Rüstəmov və onun qardaşı oğlu Vidadi Rüstəmlinin məhkəmə prosesi keçirilib.
Məhkəmə zalında yer olmadığına görə prosesi izləməyə gələnlərin bəzisi məhkəmə binasının qarşısında gözləməli olub. Bu zaman polislərlə cəbhəçilər arasında insident yaranıb, polis 12 nəfəri tutaraq aparıb. Yanvarın 16-da inzibati qaydada cəzalandırılan şəxslər istisna olmaqla digərləri yanvarın 15-i sərbəst buraxılıb.
Cərimələnəndən sonra Nicat Nizamov, Şəmistan Həziyev və Emin Maniyev də sərbəst buraxılıblar.
AXCP sədri Əli Kərimli sosial şəbəkədə yazıb ki, hakimiyyət artıq məhkəmə binalarının qarşısını da qadağan zonasına çevirib. O xatırladıb ki, cinayət məsuliyyətinə cəlb edilən cəbhəçilərin işi üzrə yanvarın 7-si Bakı Ağır Cinayətlər Məhkəməsində hazırlıq iclası keçirlən zaman da polis məhkəmə binasının önündə AXCP-nin bir neçə fəalını saxlamışdı.
Həmin vaxt saxlanan cəbhəçilər bir neçə saat sonra sərbəst buraxılmışdılar.
