“ASAN xidmət”in səlahiyyətləri artdı
Vətəndaşlara Xidmət və Sosial İnnovasiyalar üzrə Dövlət Agentliyinin səlahiyyətləri artır. Novator.az-ın məlumatına görə, yanvarın 15-də imzalanan prezident fərmanı ilə “ASAN xidmət” mərkəzləri xidməti və diplomatik pasportların verilməsi və dəyişdirilməsi; sənədə apostil verilməsi və sənədin leqallaşdırılması; viza rəsmiləşdirilməsi üçün xarici ölkələrin səfirliklərinə və konsulluqlarına notanın verilməsi hüquqları qazanır.
Xarici İşlər Nazirliyinə xidmətlərin “ASAN xidmət” mərkəzlərində həyata keçirilməsini təmin etmək üçün zəruri işçi qüvvəsi, texniki kommunikasiya və informasiya resursları ayırmaq tapşırılıb.
Vətəndaşlara Xidmət və Sosial İnnovasiyalar üzrə Dövlət Agentliyi xarici ölkələrdə müvəqqəti və ya daimi yaşayan Azərbaycan vətəndaşlarına, habelə xarici ölkələrdə olan, Azərbaycan Respublikasında daimi yaşayan vətəndaşlığı olmayan şəxslərə konsulluq xidmətlərinin “Elektron hökumət” portalı vasitəsilə elektron qaydada göstərilməsini təmin etmək həvalə edilib.
Fərman 2019-cu il martın 1-dən qüvvəyə minir.
