Ermənistanda nəyi dəyişmək gərəkdir? (Sorğunun yeni nəticələri)
Sputnikarmenia.ru saytının “2019-cu ildə Ermənistanda ilk növbədə nəyi dəyişmək gərəkdir” sualı ilə keçirdiyi internet sorğusu davam edir. Yanvarın 15-nə olan nəticələrə görə, oxucuların 20,8%-i Dağlıq Qarabağ münaqişəsinin həllini 2019-cu ilin ən başlıca vəzifəsi kimi göstərir.
Novator.az bildirir ki, digər cavab variantları üzrə nəticələr belədir:
İş yerləri yaratmaq – 28,7%
Maaş və pensiyaları artırmaq – 14,7%
Korrupsiyanı aradan qaldırmaq – 14,1%
Cinayətkarlığın səviyyəsini azaltmaq – 9,3%
Vergiləri azaltmaq – 7,6%
Konstitusiyanı dəyişmək – 4,8%.
1988-ci ildə Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci ildə ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ildə atəşkəslə dayanan müharibədə Ermənistan Dağlıq Qarabağ bölgəsini (Xankəndi şəhərini, Şuşa, Xocalı rayonlarını tam, Xocavənd rayonunu, keçmiş Ağdərə rayonunu qismən) və onun ətrafındakı bölgələri (Laçın, Kəlbəcər, Qubadlı, Zəngilan rayonlarını tam, Ağdam, Füzuli, Cəbrayıl rayonlarını qismən), eləcə də Qazax rayonunun 7, Naxçıvan Muxtar Respublikasının 1 kəndini işğal edib.
Münaqişənin dinc yolla tənzimlənməsi ilə məşğul olan ATƏT-in Minsk qrupunun təklifinə görə, Dağlıq Qarabağ bölgəsi ətrafındakı rayonlar mərhələlərlə Azərbaycanın nəzarətinə qaytarılmalı, sonra bölgənin yekun statusu müəyyənləşməlidir.
