Ermənistanın yeni parlamenti toplandı
Yanvarın 14-ü Ermənistanda yeni parlamentin ilk iclası keçirilir. Novator.az-ın məlumatına görə, iclasda prezident Armen Sərkisyan çıxış edərək deputatlara xeyir-dua verib, görülməli olan işlərə toxunub.
Ötən il dekabrın 9-da keçirilmiş növbədənkənar parlament seçkisində baş nazir səlahiyyətlərinin icraçısı Nikol Paşinyanın “Mənim addımım” bloku 70,4 faiz səslə qalib gəlib. Çiçəklənən Ermənistan Partiyası parlamentə 8,3 faiz səslə, İşıqlı Ermənistan Partiyası 6,3 faiz səslə düşüb.
“Mənim addımım” bloku 132 deputatdan ibarət yeni parlamentdə 88 mandatla təmsil edilir. Çiçəklənən Ermənistan Partiyası 26 mandat, İşıqlı Ermənistan Partiyası 18 mandat götürüb.
“Mənim addımım” bloku parlament sədri postuna baş nazirin birinci müavini Ararat Mirzoyanı namizəd irəli sürüb.
Ararat Mirzoyan 1979-cu il noyabrın 23-ü Yerevanda anadan olub. Yerevan Dövlət Universitetinin tarix fakültəsini, Dövlət İdarəçiliyi Akademiyasını və Milli Elmlər Akademiyasının aspiranturasını bitirib. Tarix elmləri namizədidir.
Milli Elmlər Akademiyasında, Ermənistan Milli Arxivində, “Reqnum” agentliyində və başqa qurumlarda müxtəlif vəzifələr tutub, Yerevan Dövlət Universitetində dərs deyib.
2017-ci ildə parlamentin deputatı seçilib, 2018-ci il mayın 11-də baş nazirin birinci müavini təyin edilib.
