Ararat Mirzoyan parlament sədri seçildi
Yanvarın 14-ü Ermənistanda yeni parlamentin sədri seçilib. Novator.az-ın məlumatına görə, yeganə namizəd olan Ararat Mirzoyan gizli səsvermədə 131 səs alıb. Bir bülleten etibarsız sayılıb.
Ararat Mirzoyanı sədr postuna “Mənim addımım” bloku irəli sürüb. Hökumət başçısı, Vətəndaş Sazişi Partiyasının lideri Nikol Paşinyanın yaratdığı “Mənim addımım” bloku ötən il dekabrın 9-da keçirilmiş növbədənkənar parlament seçkisində qalib gəlib, 132 deputatdan ibarət yeni parlamentdə 88 mandatla təmsil edilir.
Ararat Mirzoyan 1979-cu il noyabrın 23-ü Yerevanda anadan olub. Yerevan Dövlət Universitetinin tarix fakültəsini, Dövlət İdarəçiliyi Akademiyasını və Milli Elmlər Akademiyasının aspiranturasını bitirib. Tarix elmləri namizədidir.
Milli Elmlər Akademiyasında, Ermənistan Milli Arxivində, “Reqnum” agentliyində və başqa qurumlarda müxtəlif vəzifələr tutub, Yerevan Dövlət Universitetində dərs deyib.
2017-ci ildə parlamentin deputatı seçilib, 2018-ci il mayın 11-dən baş nazirin birinci müavini olub.
Ararat Mirzoyan Vətəndaş Sazişi Partiyasının öncül şəxslərindən biridir.
