Sənaye reytinqi: Azərbaycan 148 ölkə arasında 103-cüdür
BMT-nin Sənaye İnkişafı Təşkilatı (UNİDO) 2018-ci il üzrə sənayenin rəqabət qabiliyyətliliyi indeksini açıqlayıb. Azərbaycan 148 ölkə arasında 103-cü yerdə qərarlaşıb.
Novator.az-ın məlumatına görə, iqtisadçı Rövşən Ağayev “Facebook”da yaydığı şərhdə qeyd edir ki, keçmiş SSRİ məkanından Tacikistan, Qırğızıstan və Moldova Azərbaycandan aşağıda, qalanları yuxarıdadır. Ekspert Rusiyanın 32-ci, Litvanın 40-cı, Belarusun 45-ci, Estoniyanın 50-ci, Latviyanın 58-ci, Ukraynanın 65-ci, Qazaxıstanın 67-ci, Gürcüstanın 96-cı, Ermənistanın 101-ci yerdə göstərildiyini vurğulayır.
Sənayenin rəqabət qabiliyyətliliyi indeksi bu parametrlər əsasında hesablanır: emal sənayesində yaranan əlavə dəyərin adambaşına məbləği; emal sənayesi ixracının adambaşına məbləği; ölkənin dünya üzrə emal sənayesində yaranan əlavə dəyərdə payı; ölkənin dünya üzrə emal sənayesi ixracında payı.
