Xədicə İsmayılın işi: dövlət 16750 avro cərimələndi
Yanvarın 10-da Avropa İnsan Hüquqları Məhkəməsi jurnalist Xədicə İsmayılın Azərbaycan dövlətindən şikayəti ilə bağlı qərarını elan edib.
“Ameriknın səsi” xəbər verir ki, şikayət jurnalistin videosunun yayılmasına görə qaldırılan cinayət işindən verilib.
Xədicə İsmayıl Cinayət Məcəlləsinin 156-cı (şəxsi həyatın toxunulmazlığının pozulması) maddəsi ilə başlanan həmin iş üzrə icraatın effektiv aparılmamasından şikayətlənib.
Avropa İnsan Hüquqları Məhkəməsi Avropa Konvensiyasının 8-ci (şəxsi və ailə həyatına hörmət hüququ) və 10-cu (fikri ifadə etmək azadlığı) maddələrinə əsaslanaraq Xədicə İsmayılın hüquqlarının pozulduğu qərarına gəlib.
Məhkəmə şikayətin konvensiyanın 6-cı maddəsinə (ədalətli məhkəmə araşdırması) aid hissəsini araşdırmağa ehtiyac görməyib.
Yanvarın 10-da elan olunan qərarla Avropa Məhkəməsi Azərbaycan dövlətini cərimələyib. Qərara əsasən, Xədicə İsmayıla mənəvi zərərə görə 15 min avro, məhkəmə xərclərinə görə isə 1750 avro təzminat ödənməlidir.
Şikayətə səbəb olan videolar Xədicə İsmayılın yaşadığı mənzildə gizli yolla çəkilib. Şantaj videoları 2012-ci ildə yayılıb. Ardınca dövlət nəzarətində olan bəzi qəzetlərdə Xədicə İsmayılı qeyri-peşəkarlıqda, hökumətə qarşı qərəzdə və əxlaqsızlıqda ittiham edən yazılar dərc edilib.
Videolar yayıldıqdan sonra Xədicə İsmayıl mənzilində ondan xəbərsiz quraşdırılmış çoxlu kamera, çəkilişi ötürən transmitterlər və ikinci telefon xətti aşkarlayıb.
Xədicə İsmayıl hesab edir ki, hüquq mühafizə orqanları onun bu məsələ ilə bağlı şikayətini effektiv araşdırmayıb.
Jurnalist Avropa Məhkəməsinə öz həbsi ilə bağlı da şikayət edib. O, 2014-cü il dekabrın 5-dən 2016-cı il mayın 25-dək həbsdə olub.
Bakı Ağır Cinayətlər Məhkəməsi onu 7 il 6 ay azadlıqdan məhrum edib, sonradan Ali Məhkəmə 3 il 6 ay cəza kəsərək həmin müddətin şərti sayılmasına qərar verib. Beləliklə, Xədicə İsmayıl azadlığa buraxılıb.
1976-cı ildə Bakıda anadan olan Xədicə İsmayıl 1997-ci ildə Bakı Dövlət Universitetini bitirib. Jurnalist fəaliyyətinə “Günaydın” qəzetində başlayıb, bir sıra KİV-lərdə, o cümlədən “Zerkalo”, “Exo” qəzetlərində, “Amerikanın səsi” radiosunda çalışıb. 2008-ci ildən “Azadlıq” radiosunda işləyib. 2008-2010-cu illərdə radionun Bakı bürosuna rəhbərlik edib.
Jurnalist hesab edir ki, videolarla şantaj edilməsinin də, həbs olunmasının da kökündə onun korrupsiya halları ilə bağlı araşdırmaları dayanır.
