Ekspert manata təhlükə görür
Dövlət Neft Fondu Mərkəzi Bankın 2018-ci ildə keçirdiyi valyuta hərraclarında satdığı valyutanın həcmini 6 milyard 460,4 milyon dollar göstərib. Novator.az-ın məlumatına görə, bu məsələ barədə şərh yayan iqtisadçı Qubad İbadoğlu bildirir ki, 2018-ci ildə satılan vəsaitin həcmi 2017-ci ilin göstəricisini xeyli üstələyir. 2017-ci ildə Dövlət Neft Fondu valyuta hərraclarında 3 milyard 598 milyon dollar satıb.
Ekspert yazır ki, rəsmi statistikaya əsasən, 2018-ci ilin 11 ayında idxalın həcmi 10 milyard 295,5 milyon dollar olub, bu da əvvəlki ilin eyni dövrü ilə müqayisədə 32,2 faiz çoxdur: “Ötən il idxal əməliyyatları 2013-cü ildən sonra ən yüksək səviyyədə qeydə alınıb, xarici ticarətdə müsbət saldo azalıb. Şübhəsiz, dünya bazarında neftin ucuzlaşması ixracatı və ilin sonunda idxalın artımı xarici ticarətdə müsbət saldonun daha da azalmasına gətirib çıxaracaq. Manata təzyiq artıb. Bu il, xüsusilə neftin ucuzlaşacağı halda, manatın sabitliyinə risklər və status-kvonun qorunması nəticəsində yan fəsadlar çoxalacaq”.
Novator.az bildirir ki, Dövlət Gömrük Komitəsi 2018-ci ilin 11 ayı üzrə idxal əməliyyatlarının dinamikasını belə göstərib: yanvar – 689,7 milyon dollar, fevral – 762,8 milyon dollar, mart – 739,1 milyon dollar, aprel – 834,5 milyon dollar, may – 829,2 milyon dollar, iyun – 804,9 milyon dollar, iyul – 1 milyard 116,9 milyon dollar, avqust – 1 milyard 86,4 milyon dollar, sentyabr – 1 milyard 41,6 milyon dollar, oktyabr – 1 milyard 347,5 milyon dollar, noyabr – 1 milyard 42,6 milyon dollar.
