Müdafiə nazirindən yeni tapşırıqlar
Müdafiə naziri Zakir Həsənov yanvarın 5-i Mərkəzi Komanda Məntəqəsində xidməti müşavirə keçirib. Mod.gov.az-ın məlumatına görə, nazir müavinləri, qoşun növləri komandanları, nazirliyin baş idarə, idarə və xidmət rəisləri, birlik komandirlərinin iştirakı ilə keçirilən müşavirəyə cəbhə bölgəsində yerləşən birləşmə komandirləri və digər məsul zabitlər video vasitəsilə cəlb olunub.
Nazir qoşunların təmas xəttindəki vəziyyəti təhlil edərək ötən il görülən işlər, əldə edilmiş uğurlar və 2019-cu ildə yerinə yetiriləcək fəaliyyətlər barədə çıxış edib. Qoşun növü və qisimlərinin fəaliyyətinə toxunan Zakir Həsənov müşavirə iştirakçılarından əsas diqqətin döyüş hazırlığı, qoşunların operativ, fasiləsiz və gizli idarə edilməsi, müdafiə sisteminin dayanıqlığı, qarşılıqlı fəaliyyətlərin təkmilləşdirilməsi, komandir və rəis heyətinin peşəkarlığının daim artırılması, şəxsi heyətin təlim-tərbiyəsi, vətənpərvərlik və döyüş ruhunun möhkəmləndirilməsi, hərbi qulluqçuların sağlamlığı və döyüş təminatının digər aspektlərinə yönəldilməsini tələb edib.
Müdafiə naziri qeyd edib ki, ölkənin güclü hərbi potensialı və Azərbaycan Ordusunun döyüş qabiliyyəti ərazi bütövlüyünün təmin edilməsində əsas amillərdən biridir. O bildirib ki, qoşunların taktiki, operativ və strateji səviyyələrdə fəaliyyətləri daim təkmilləşdirilməli, şəxsi heyət düşmən üzərində üstünlüyü qorumaqla hər an döyüş əməliyyatlarına hazır olmalıdır.
