Yeni partiya qurulur
Azərbaycan Xalqlarının Rifahı Partiyası yaradılır. “Turan”ın məlumatına görə, yeddi nəfərlik təşəbbüs qrupu yanvarın 2-si Bakıda iclas keçirib.
Təşəbbüs qrupuna Seyidəmir Məmmədov, Sabir Hüseynov, Əlimərdan Şükürov, Elman Məmmədov, Mehdibəy Səfərov, Mirtağı Nəsirov, Rafiq Cəlilov daxildir.
Rafiq Cəlilov “Tolışon sədo” (“Talışların səsi”) qəzetinin baş redaktoru, Mehdibəy Səfərov “Azəri-Talış” İctimai Birliyinin rəhbəridir.
Təşəbbüs qrupunun digər üzvləri ictimai-siyasi dairələrdə tanınmış şəxslər deyil.
Azərbaycan Xalqlarının Rifahı Partiyasının təşəbbüs qrupunun bəyanatında deyilir: “Azərbaycanda çoxsaylı partiyaların olmasına baxmayaraq həmin siyasi təşkilatların heç birinin məramnamə və nizamnaməsində Azərbaycanda yaşayan qardaş xalqların mədəniyyətlərini, adət-ənənələrini, milli-mənəvi dəyərlərini yaşatmaq, ölkənin siyasi proseslərində bərabərhüquqlu iştirakını, eləcə də onların mənəvi və maddi rifahlarını prioritet tutan bənd və ya müddəa yoxdur. Əksinə, bəzi partiyaların funksionerləri və xadimləri destruktiv, bir sıra hallarda isə xalqlar arasında nifaq salmaq istiqamətində ifrat millətçi mövqe tuturlar.
Bununla əlaqədar Azərbaycandakı bütün xalqların mənafeyini qoruya biləcək yeni bir siyasi təşkilatın yaranması zərurəti meydana gəlib. Yeni partiya Azərbaycanın gələcəyini bütün xalqların konstitusiyada təsbit olunmuş hüquq və azadlıqlarının qorunmasında görür. Dilindən və dinindən asılı olmayaraq bütün ölkə vətəndaşları partiyaya üzv ola bilər”.
