Müsavat fəalının həbsindən verilmiş şikayətə baxılıb
Yanvarın 3-də Bakı Apellyasiya Məhkəməsində Müsavat Partiyası Gənclər Təşkilatının sədri Əbülfəz Sadıqbəylinin həbsi ilə bağlı şikayətə baxılıb.
Əbülfəz Sadıqbəyli 2018-ci ilin noyabrında tutulub. Ayın 21-də Səbail Rayon Məhkəməsi onun barəsində 3 aylıq həbs qətimkan tədbiri seçib. Gənc fəala dələduzluq və saxta sənəd hazırlayıb ondan istifadə etmək ittihamı verilib.
İttihama əsasən, Əbülfəz Sadıqbəyli yol polisinə “Nikoyl” bankının krediti ilə aldığı “Niva” markalı avtomobilə görə borclu qaldığı 5 min 100 manatın ödənməsi barədə saxta arayış təqdim edərək maşını öz mülkiyyətinə keçirib, daha sonra satıb.
Müdafiə tərəfi ittihamı əsassız sayır. Müsavat Partiyası hesab edir ki, Əbülfəz Sadıqbəyli siyasi motivlərlə təqib olunur.
Tutulandan az sonra müdafiəçiləri Əbülfəz Sadıqbəyli barəsində seçilmiş həbs qətimkan tədbirinin ev dustaqlığı ilə əvəz olunmasını istəsələr də Səbail məhkəməsi bundan imtina etmişdi.
Yanvarın 3-də Bakı Apellyasiya Məhkəməsində baxılan şikayət həmin imtina qərarından verilib.
“Turan”ın məlumatına görə, apellyasiya instansiyası şikayəti təmin etməyib, Səbail məhkəməsinin qərarı qüvvədə saxlanıb.
